應試心得

考好DSE中文科:6個不能不知的溫習原則

踏入十月,好多同學都開始上力,除左去補習之外都會花時間溫書。但係點樣先可以溫得有效率啲呢?其實,「溫習」,不外乎「消化」同「操練」。今日就會同大家講講6個不能不知嘅溫習原則。

1. 坐言起行,不再等聽日

首先,好多同學鍾意幫自己設計溫習時間表,但內容往往都係Plan定聽日甚至下個禮拜溫乜。所謂「明日復明日,明日何其多?」與其為聽日去計劃點樣做,不如今日就坐言起行,揭開本書溫下啦!

2. 讓溫習成為你的習慣

真正讀得書嘅人,係唔會安排自己一日讀好多書。一日讀太多野嘅話,你唔單止會覺得溫習好痛苦,亦會好快忘記咗當日讀嘅內容。所以,與其編制一個好密集嘅溫習時間表,不如將所有嘢攤開嚟溫,每日睇少少,令到溫習好似慢跑咁,成為你嘅習慣。咁樣你就會每日都吸收到知識之餘,亦都唔會咁快對讀書生厭。

3. 不要設定太多目標

我知有好多同學會排好晒時間表去溫習。我覺得呢個做法係可取嘅,證明你個人有計劃。但係有啲同學就會將時間表編得太密集。例如一晚有三個鐘,你用一個半鐘頭作文,再用一個半鐘頭操綜合,臨瞓前再用30分鐘背英文生字。咁樣我就覺得太過密集啦!溫習又好、補習又好,其實你需要時間消化同思考,而唔係一味死操爛操。所以我會建議大家唔好將目標set得太多,一晚可能只係完成一至兩個目標就已經足夠。坦白講,你用一晚時間讀通一個課題,好過你曬咗幾晚時間都淨係得個操字。

4. 不要浪費太多時間製作筆記

其實,補習嗰陣俾你份筆記已經係好整齊、好實用。當然我唔反對大家自製筆記,但係如果大家唔係想將啲筆記拎出去買,我就唔建議大家花太多時間自製筆記喇!可能你哋會見到喺IG上面有好多人整咗啲好靚嘅筆記,而你哋又好羨慕,Right?但係,整呢啲靚靚筆記又要填顏色、又要畫公仔,所花嘅時間,可能比你溫習嘅時間仲多!我唔係反對大家做筆記,不過就真係唔使整到好靚好整齊。整筆記,最緊要快同實用!

5. 操練時不應揀擇

以中文科為例,作文嗰陣,大家好鍾意揀一啲自己擅長嘅題目去做。唔係話咁樣唔得,但係你諗下,實際考試嗰陣,你又有無得左揀右揀?如果唔得嘅話,我就建議每次操作文嗰陣就唔好太揀擇,例如一份Mock有三條題目,你就應該淨係喺嗰三條題目入面揀一條嚟操練,而唔好話專登搵幾份Mock,然後搵到一條自己有信心嘅先落筆寫。又例如你嚟跟我補習,通常我每個月都淨係比六條題目你,咁你就喺嗰六條入面揀嚟作。反正你去到考試嗰陣都只可以三條揀一條㗎啦,你依家為咗自己操練得舒服啲,而令自己嘅操練冇效果,咁又值唔值得呢?

6. 不應過分沉迷在擅長的項目上

記住,溫書嘅目的係要令到自己成績有提升,而唔係刷滿足感。舉個例,如果你綜合本身已經好勁,補習講嘅Skills你又識曬,交文又次次喺我手上都拎到高分,咁你就唔需要再花太多時間操綜合;相反,你應該將時間擺喺一啲你唔擅長嘅項目上面。如果你淨係一味做自己擅長的項目,冇錯你係會好滿足,但係對你嘅成績一啲幫助都冇!呢點對於溫習其他科都適用架!

Show More
Back to top button