應試心得

考好DSE中文科:4個閱讀卷常考能力點

好多同學覺得閱讀理解好難捉摸,因為佢哋成日覺得閱讀理解題目唔知問乜,於是乎佢哋都唔知答乜好。今日就會講講四個閱讀理解常考嘅能力點。

1. 作者寫「XXX」的作用或用意

第一種係常見嘅題型係用意題,通常會問考生作者寫「XXX」嘅用意或者作用係乜。其實大家細心諗下,作者寫一篇文章為嘅就係帶出佢嘅想法。依家題目問你作者寫某樣嘢嘅用意,嗰樣嘢咪就係為咗想帶出文章既主旨或者段旨囉!因此,下次遇到相似題目,不妨試試歸納該段段旨,然後嘗試用自己的文字將該段段旨連繫上題目的關鍵字眼答題,相信能夠拎到唔錯分數。

2. 作者寫配角有何作用

第二種常考題型會問考生:「點解明明主角係A,但係作者又會寫B呢?」心水清嘅同學就會知呢種題目其實係考你識唔識「襯托」,例如2014同2018都有出過類似嘅題目。當然,若果大家明白「正襯」同「反襯」嘅分別就更加好啦!下次遇到相近題型,相信大家都會有方向去思考答乜。

3. 作者為何寫「反話」?

「襯托」通常會出現於記敘或者描寫文入面;而「反諷」就通常會出現喺說理文入面喇。有時大家睇文章,會發現作者寫一兩句所謂「反話」。例如明明講緊呢個社會嘅人好冷漠,但係作者就發現爆左句:「他們真熱情、真大方!」呢度嘅「熱情」、「大方」係反諷緊啲人冷漠、不理世事,而唔係真係讚賞緊佢哋熱情。呢種用「反話」去說理嘅手法就係「反諷」喇,2015同2019年都有考過㗎!

4. 分析人物性格特質

最後一種常見題型就係分析人物性格喇。呢類題型其實唔會太難,但要提醒大家,作答嗰陣一定要搵到證據先可以答,例如文中人物講過或有做過相關說話同行為先可以判斷,唔可以單憑感覺去決定人物性格答乜。

以上四個就係閱讀理解常考嘅能力點,希望幫到大家手,下次做閱讀理解都有個方向去估題目問乜啦!

Show More
Back to top button