應試心得

考好DSE中文科:4個準備閱讀卷的方向

面對閱讀卷,相信唔少同學都會感到好頭痕。成日都唔知點溫好,淨係識背下啲手法名?今日就等我同大家講講可以點樣準備閱讀卷。

1. 了解歷屆出題模式

其實文憑試已經推行咗好幾年,出題模式開始穩定,好多題目都會翻炒過往出過嘅題型。所以,剩返幾個月,各位同學應該研究歷屆試題,熟悉每種題型嘅問法同答法,咁到你自己考試嗰陣,如果佢出返啲過往出過嘅題型,你就能夠迅速答中考評要求啦!

2. 熟記常見文言字詞及句式

好多同學都以為文言文佔分少,唔值得投資。但事實上,由於文言文出題比較簡單同公式化,每年出題模式都相近,大家係應該好好準備文言文部份。而要準備好文言文部份,大家需要熟記一啲常見嘅文言字詞同句式,提升自己理解文言文嘅能力。到時無論佢出啲咩問題,只要你睇得明篇章,大部份都會識答。所以,剩返幾個月,大家係時候拎住一啲常見字詞去背去記。雖然坊間有人話靠技巧可以做到某啲題目,但如果你想攞高分,一啲基礎必要嘅知識你都要有,唔可以淨係單靠技巧。

3. 掌握重點擷取方法

白話文閱讀理解看似困難,其實每一條題目都會問緊你文章嘅主旨。如果大家要喺閱讀理解卷拎高分,擷取重點嘅能力一定要有。剩返幾個月,大家要訓練自己睇文章嗰陣,概括到文章嘅段落重點同大意。到時面對新題型,就算唔識答,照寫寫返文章嘅主旨或者段旨落去,通常都可以得到唔錯嘅分數。

4. 切勿誤將心力放在手法題目

好多同學見閱讀理解會考關於修辭同寫作手法嘅題目,於是花費大量嘅時間同心機去背寫作手法同埋修辭手法。但係,根據經驗,其實每年有關寫作手法同修辭手法嘅題目都唔超過5分。我哋唔係叫大家完全唔溫有關知識,不過千祈唔好本末倒置,將大量時間花費喺手法題目上面,甚至以為溫左寫作手法同修辭手法就係溫左閱讀理解。

Show More
Back to top button