應試心得

考好DSE中文科:4個準備作文卷的方向

作文卷係中文科佔分最重嘅一份卷(沒有之一,因為考評局每年都會偷偷將作文卷分數比例提高),同學們想考好中文科,當然要及早預備呢份卷啦!今日就同大家講下點準備作文卷。

1. 揀定主攻文體

熟悉中文科考試嘅同學都會知道,每年考試都要求考生喺三條寫作題目入面揀一題寫作長文一篇。而每年都總會有一題可作傳統說理文,一題可作傳統記敘文。因此,同學呢一刻就應該揀定主攻文體,喺未來三至四個月入面不斷練習,要求自己每次寫文章都按定嘅文體結構去寫,催谷自己狀態,務求考試當日以最佳狀態應戰。不過,另一種文體都要作多兩三篇,即使考試當日睇唔明主攻文體條題目,都可以有後備方案應對。

2. 設計好個人寫作素材庫

如果你以為作文真係考臨場寫作能力,咁你就大錯特錯啦!其實,即使每次寫作題目都會唔同,但有啲素材大家都可以準備定先,入到試場就唔洗由零開始諗點作,而係揀返啲岩洗嘅素材嚟用。如果作開說理文嘅同學,可以先準備幾個常用嘅開首同結尾段,背誦一啲實用嘅四字成語,並且背誦若干實例作論證之用;而作開記敘文嘅同學就可以設計定幾個特別嘅情節同角色,背誦返啲優美語句,到時考試就揀返啲適合嘅素材去用,自然就更穩陣啦!

3. 分析歷屆試題考問方向

雖然話Past Paper已經係Past,唔會再出一模一樣嘅題目,但其實考評局每年出題嘅考問方向都係大同小異。剩返唔夠120日,梗係要針對式訓練,除左以學校 / 補習社自擬嘅題目作練習之外,更應該將主攻文體嘅歷屆試題都做一次,再交比你嘅老師批改,從而了解返考評局嘅出題方向,目標為本咁準備你嘅DSE。

4. 訓練字速及字體

通常要拎5**都要寫大約1400-1600字嘅文章。如果同學平時唔係讀開文科嘅話,喺一個半鐘頭入面要寫1400字文章可能會感到吃力。因此,趁考試前幾個月就應該開始計時寫作,真係寫唔曬先轉用第二種顏色筆去寫,逼自己喺限時內完成作文,咁考試當日字速就唔會慢得去邊啦!另外,字體唔靚嘅話唔單止會影喺「標點字體」分數,更有機會令考官唔知你寫咩字,以為你寫錯字,扣你錯別字分。所以,趁仲有時間,練返寫靚啲字先啦?

Show More
Back to top button