應試心得

考好DSE中文科:4個做好首輪發言的方法

坦白講,做Oral冇話有一個官方嘅做法,只要你思維敏銳,論述清晰,回應得當,語調適中,其實就能夠拎到5**成績。不過,綜合我多年教學經驗,發現好多同學做首輪發言嘅時候都會有一啲通病。今日就講四個方法幫你做好啲首輪發言。

1. 盡早表達立場

唔知係咪因爲坊間好多名師教路,我發現好多學生都鍾意講少少同題目相關嘅背景資料做引入,尤其是A、B號考生。當然,做引入係冇問題,但好多時同學就會走火入魔,引入左成30秒甚至40年都未講自己立場同埋論點。因此,我比大家第一個提示就係盡快表達立場。喺首輪發現嘅時間,盡快入題,引入可以短少少,一來能夠令到考官知道你嘅取態,二來亦都能夠令你發現更加有條理,何樂而不為?

2. 不要一次發表太多論點

好多同學鍾意喺首輪發言嗰陣一次過講曬自己嘅論點,然後喺發言結尾講句「跟住落嚟自由討論時間我會詳細解釋其他論點」就算。要知道做Oral唔係鬥快,唔係話你講咗個論點先就當你贏。因此,一次過發表太多論點而不作解釋唔單止嘥時間,更加會令你發言唔夠完整,百害而無一利。

3. 解釋論點時多作比較

近年來口試題目出咗好多「選項題」,要求大家二揀一或者三揀一。因此,大家解釋論點嗰陣,記得唔好淨係講點解你揀A,要講埋點解唔揀B,從而展示「比較意識」。舉個簡單例子,如果今日你去食Lunch,有得揀食魚生飯同咖哩飯,你唔單止要話畀人聽「因為今日好熱,所以我想食凍啲嘅魚生飯」,更加要比較埋「相返,咖哩飯熱辣辣,食完個人仲會好慶,所以我今日唔食咖哩飯」,明無?

4. 注意時間,使發言完整

最後,雖然首輪發言同自由討論係唔會獨立評分,但係全場Oral嘅目的都係為咗「展示畀考官睇你嘅說話能力」,而時間控制都係說話能力嘅其中一項。因此,建議大家自己多做一分鐘發言練習,了解自己一分鐘大概講到幾多嘢,從而令自己每次首輪發言都唔會過早完或者講唔曬,展示畀考官睇你有出色嘅時間控制能力。

Show More
Back to top button