應試心得

考好DSE中文科:3個讀文言範文應有的心態

文言範文部分佔卷一30%,計返數都值全科7.5%,重要性都唔低架!因此,今日就會講下3個讀文言範文應該要有嘅心態。

1. 理解各篇章主旨及重點

首先,各位同學喺呢一刻必須要理解各篇章嘅主旨同重點。要知道作者因為啲乜嘢原因去寫呢篇文,同埋各個篇章背後想表達嘅內容。喺文言範文考核入面,大部份題目都係考考生對文章嘅理解,所以唔可以齋睇一次表面意思就當自己讀咗文言範文,而係要深層次咁去理解嗰個篇章嘅寫作目的。

2. 熟記各篇章文言字詞解釋

另外,喺文言範文入面,有兩種字詞大家必須要熟記。一種係文言常見嘅字詞,而另一種係唔常見但係喺文章入面起重要作用嘅字詞。前者除咗幫到大家考文言範文,對大家理解文言閱讀篇章都好有幫助。而後者就更加係文言範文考核嘅重點,所以大家要了解各篇章每個字詞嘅意思,反覆熟記。

3. 不要盲目背誦篇章

好多同學以為文言範文考核就係考大家背書,所以花費大量時間去背誦篇章。當然,你能夠背得曬所有篇章就最好;但係如果真係背唔晒啲篇章,都唔需要過分擔心,亦唔需要花太多時間喺背誦之上。因為,每年只會有大約3至4分係要求考生摘錄原文作答,其餘大部份題目都係考考生理解,所以大家要背嘅話就唔係背篇章,而係背篇章背後嘅解釋。

Show More
Back to top button