應試心得

考好DSE中文科:3個溫習必備心態

考好中文,除左要有紮實嘅基礎之外,亦需要調整好心態,唔好鑽牛角尖,先能夠事半功倍。今日就同大家講講3個溫習中文科必備嘅心態。

1. 小心翼翼,穩中求勝

喺我多年教學生涯入面,成日會遇到啲硬係要追求「勁」同「難」嘅學生。佢哋有啲係語文基礎唔錯,想靠所謂「勁」嘢拎星;亦有啲係根底薄弱,想「劍走偏鋒」,靠啲「難」Points搏分。但老實講,無論係前者定後者,通常都係徒勞無功,甚至會因為揀錯立場/論點而失手離題,得不償失。例如啲同學次次作文都揀最難寫、最刁鑽嘅題目/立場,結果滿口歪理,打橫嚟講;又有啲同學無論作文定綜合又好,都一定要逼自己塞文化點落去;甚至有啲同有正常寫作框架唔用,次次作文都諗住用奇特框架,例如夾敘夾議、散敘、第三人稱寫作等。呢啲框架喺拿揑詳略方面相當具難度,唔係咁易㗎師傅!

其實,中文科要考得好,係要「平均」、「穩定」咁四份卷都拎唔錯嘅分數,而唔係「鬥勁」、「鬥深」。我讀書嗰陣,Miss同過我哋講,考好中文科係要Play Safe,越穩陣安全,就越易高分。希望大家都能夠領略箇中道理啦!

2. 靈活變通,心技合一

經我觀察,每年都總會有啲同學學咗好多坊間嘅所謂「Skills」,然後喺考試入面用唔出,跟住就指責果啲「Skills」無用。事實上又係咪真係咁呢?例如有同學背咗啲靚字靚句,作文果陣背曬出黎,但用得唔自然,或者用得相當夾硬;又有同學背曬每種試題應該點答,但去到考試總係遇到新題型;更有同學學咗好多作文、說話框架,但去到考試無一個能夠完全Fit到題目要求。

其實,「窮則變,變則通!」框架係死嘅,人係生嘅,框架只係用黎幫你從多啲唔同角度諗Points,唔代表考試果陣只能夠用一種框架。自己做下變化,框架以外加啲自己野,先係最佳做法。中文科考試一半係考舊野,一半係考新野。如果你認為中文好似數學咁有必然正確嘅「公式」,而下下追求要跟住呢啲「公式」走,你會死得好慘。靈活變通,見招拆招,取其實而不取其形,方為上策。

3. 學以致用,熟能生巧

教學多年,每年總會遇到一種學生:佢地去補習嘅目的就係「聽」大量嘅SKILLS、「拎」大量嘅配套。技巧、練習唔夠多,佢會嫌棄;但問佢返屋企操左幾多篇文,KO左幾多篇練習,佢就會笑笑口唔出聲,支吾以對。簡單啲黎講,世上有一種學生永遠怕執輸,唔希望自己嘅資源少過他人;但佢地永遠都唔明白,就算幾犀利嘅武功,都要配合刻苦嘅訓練,嗰門武功先會真正屬於你。例如有同學上堂學左啲作文技巧,睇範文嗰陣覺得好勁好正,但當到場考試就一招都用唔出;又有同學誤信坊間宣傳口號,以為作文真係「寫小學雞字」就高分;或者做文言文可以一隻字都唔背就睇得明。

其實所謂嘅作文技巧,都只係將前人成功嘅竅門同心得歸納而成;而唔係速效藥,唔係學完就即刻用得出。語文科係需要時間浸,你支筆係需要儲墨水,如嗰平時一篇文都唔作,考試嗰陣又點會寫得出高分文章?中文科同其他科一樣,無、捷、徑。你讀數會操數,讀中文一樣要操Paper,千祈唔好以為中文係母語就唔洗擺時間。無錯,我曾經多次表示中文科考試嘅考核方向係唔合理,但唔代表佢出題會亂咁出。相反,所有題目都係有路捉。嘅然有路捉,就要花時間去練習,考試嗰陣先有機會拎到高分。

Show More
Back to top button